As seis pezas reunidas neste libro son froito de diversos proxectos realizados por Amantia Coello cos grupos que traballou, nos últimos anos, e se ben foron creados coa xuventude, non teñen idade. Cada obra lévanos a unha atmosfera única, na que se propoñen temáticas que conectan a nosa realidade coa fantasía, os dereitos humanos, a memoria, a perspectiva de xénero, o pensamento crítico, o humor, a creatividade..., mesturando o plano artístico co educativo, para regalía de quen queira construír a través do teatro.

Unha viaxe dos distópicos escenarios de Reset dominados polas tecnoloxías nunha civilización feita anacos, aos mundos mitolóxicos da tradición galega abrazados en Lendatarias ou a unha nova achega aos clásicos mitos gregos de Rapsodia de Elas, pasando a revirar contos en Unha de Contos Descontados, para acto seguido achegarnos a catro grandes autoras galegas en Escolma para 4, e chegando ao atrevido Enclave D.X., descubrindo outras perspectivas xogando a cambiar os por as.